Kundenrückmeldungen

Liebe Peter, du hesch mech met dinere Onderstötzig so mängisch zum lache ond schmonzle brocht, hesch mer Muet gmacht ond mech emmer weder öberrascht. Ech ha dini Feedbacks ond dini diräkti, offni ond ehrlechi Art sehr gschätzt. Es esch wonderschön en Begleiter a de Site z’ha wo a eim glaubt ond uf empathischi Art ond Wis ufzeigt wo mer nochli a sech chönnti schaffe oder no Wachstomspotential ome esch. Dini liebevolle Erennerige ond s’Nochehoge hed mer gholfe dörezhalte ond ned ufzgäh. Eifach es riese Gschänk der döffe begägnet z’si ond vo der onderstötzt ond begleitet z’wärde. Danke vöu Mol!

K.V.


Vor zwöi Johr hani e Traum gha, es Härzdeng. Ergendeinisch, hani dänkt, wotti Zit ha zom Schribe ond anderi Mönsche zum Schribe z’brenge. Ergendeinisch, möchti mini eigene spirituelle Agebot mache, so, wie ech dänke, dass sie guet tönt ond de Schatz vo de chrischtliche Spiritualität verbendid met de Weisheite vo andere Religione, Traditione und Kulture ond met dem, wo eus Mönsche do höt bewegt.

Es esch e Traum gsi ond erscht im ne Gschpröch met em Peter hani gmerkt: Jetz esch es Zit, dä Traum a’zgo. De Peter hed mer gholfe, d’Startpflöck i’zschlo und mer de ganz vöu Zit glo, mine eiget Wäg z’fende. Dank sinnere Röggedeckig beni dra blobe. Dank sine guete Aregige hani mini Idee vonere eigene Homepage omgesetzt und mine erscht Newsletter verscheckt. Ganz im Hendergrond, aber met guete Froge ond höufriche Röckmäldige, met Bestärchig ond eme onerschötterliche Glaube a mis Projekt, hed de Peter a wechtige Bitrag gleischtet, dass ech jetzt zmetzt im Ufbou vo mim eigene Atelier be ond de Muet ha, dra z’glaube, dass es glengt.

Irene Meyer